Obinwanne Okeke: US court sentence ‘Invictus Obi’ to 10 years in prison

US court don sentence Nigerian, Obinwanne Okeke, wey pipo sabi as ‘Invictus Obi’ to 10 years in prison for im involvement in computer-based intrusion fraud scheme wey dem say cause reach $11 million in losses to im victims.

After di judgement, di US Attorney for di Eastern District of Virginia Raj Parekh wia dem judge di case say:

“Through subterfuge and impersonation, Obinwanne Okeke engage in multi-year global business email and computer hacking scheme wey cause ogbonge $11 million losses to im victims,”

“Today sentence further demonstrate EDVA’s and FBI worldwide reach in pursuing justice on behalf of American victims and odas and holding international cybercriminals accountable, no mata wia dem commit dia crimes.”

 

According to court documents, Obinwanne Okeke, wey be 33 bin dey operate one group of companies wey pipo sabi as Invictus Group.

E based in Nigeria and oda place. Di accuse include say na from like 2015 to 2019, Okeke and odas bin engage in a conspiracy to conduct various computer-based frauds. Dem obtain and compile di credentials of hundreds of victims, wey include victims for di Eastern District of Virginia.

Okeke arrest by di America Federal Bureau of Investigation (FBI) for August, 2019 for US bin make headlines for Nigeria and across di world.

US bin charge am wit two counts of computer and wire fraud to tiff $11 million from im victims. Accuse wey im bin plead guilty to.

For 2016, Forbes bin celebrate di 31 years old Obi as one of Africa best 30 business pipo wey dey less dan 30 years.

Special Agent in charge of FBI for Norfolk Field Office add afta di sentencing say:

“Di FBI no go allow cyber criminals free hand for di digital world to take advantage of U.S. companies,”

“Dis sentencing demonstrate FBI commitment to work with our partners for di Department of Justice and our foreign counterparts to locate cyber criminals across di globe and bring dem to di United States to face di music.”

Anoda popular Nigerian wey im case similar to Okeke own, wey still dey court, na Ramoni Igbalode alias Hushpuppi.

Di International Police (Interpol) and di FBI arrest Hushpuppi on Wednesday, June 10, 2020 for di United Arab Emirates wit connection to one $35million ventilator scam.

Leave a Reply

Your email address will not be published. Required fields are marked *